Morgunblaðið: Gefur út vísnabók fyrir börn á táknmáli

Morgunblaðið 20. september 2010

Tinna táknmálsálfur túlkar texta og ljóð í sérstakri vefútgáfu
Höfundurinn vildi að öll börn gætu nýtt sér efnið

Þegar kisan Glingló tekur upp á því að stríða bola snýr hann vörn í sókn og hún lærir dýrmæta lexíu. Um þetta fjallar ein saga í nýjustu bókinni um Grallarana sem kom út á dögunum, en bókin er einnig gefin út á vefnum í sérstakri táknmálsútgáfu.

Þetta er í fyrsta sinn sem ljóð eru gefin út á táknmáli fyrir börn, en bækurnar um grallarana eru bæði í texta- og vísnaformi. Höfundur bókanna um Grallarana er Selma Hrönn Maríudóttir, en hún fékk Samskiptamiðstöð heyrnarlausra í lið með sér við vinnslu bókarinnar. Selma starfar við vefsíðugerð, m.a. fyrir Samskiptamiðstöð. „Ég hef fylgst með þeim í mörg ár og var búin að sjá tilraunir sem þau hafa gert með erlendar barnabækur. Mér fannst, sem barnabókahöfundur, að auðvitað ætti maður að huga að því að öll börn gætu nýtt sér efnið.“

Kolbrún Völkudóttir er táknmálsþulur í nýju útgáfunni.  „Hún hefur verið viðloðandi mikið af því barnaefni sem hefur verið gert fyrir heyrnarlaus börn og leikur m.a. Tinnu táknmálsálf í Stundinni okkar. Hún kemur þessu mjög vel til skila.“Selma telur þetta í fyrsta sinn sem íslenskur barnabókarhöfundur stendur sjálfur að slíkri útgáfu. „Þetta er dálítið dýrt þegar hugað er að fjölda heyrnarlausra barna á þessum aldri,“ segir hún en bækurnar eru fyrir börn á aldrinum 2 – 6 ára. „Við ákváðum því að áskrifendur að vefnum okkar, grallarar.is, fengju að hlaða þessu frítt niður. Þannig geta fleiri nýtt sér þetta, s.s. þeir sem eru að læra táknmál og aðrir sem gætu haft áhuga.“